میانوالی نیوز

میانوالی(نوید ملک سے) ڈی ایس پی سرکل پپلاں خالد محمود رانجھا نے اپنے آفس میں پریس کانفرنس کرتے ہوئے کہا کہ وزیر اعلیٰ پنجاب سردار عثمان احمد خان بزدار کی ہدایت کے مطابق صوبے کی تمام بین الصوبائی چیک پوسٹوں اور ریموٹ سرچ پوائنٹس پرکڑی نگرانی کے ساتھ ساتھ دہشت گردوں، جرائم پیشہ عناصراور سماج دشمن گروہوں کے خلاف خصوصی مہم جاری ہے تاکہ ان کے گرد گھیرا تنگ کرتے ہوئے انہیں کیفر کردار تک پہنچایا جاسکے۔ اسی مہم کے مطابق ڈی پی او میانوالی ممتازاحمد دیو کی نگرانی میںآج ایس ایچ اوتھانہ ہرنولی محمد ظہیر احمداور اس کی ٹیم نے چیک پوسٹ ہرنولی موڑ پر ناکہ بندی کرکے ضلع میں داخل ہونے والی اور ضلع سے جانے والی گاڑیوں کی چیکنگ کی۔ دوران چیکنگ میانوالی سے آنے والی ٹیوٹا کرولا XLIکار نمبر یLE-4356 کو روک کر چیک کیا تو ڈرائیور کی جامع تلاشی لینے پر اسکی قمیض کے نیچے پیٹ کے ساتھ 500/500گرام کے4پیکٹ بندھے ہوئے تھے جن کو چیک کرنے پر ان کے اندر ہیروئن پائی گئی۔ڈرائیور نے اپنا نام و پتہ سخاوت خان ولد مہر محمد سکنہ خٹک بستی مکان نمبر E-36/16شہزاد کالونی میانوالی بتایا۔ مزید کار کی فرنٹ سیٹ پر مسمات شبانہ زوجہ سخاوت خان کو لیڈی کنسٹیبل کے ذریعے گاڑی کے اندر تلاشی لینے پر اسکی گود میں پڑے ہوئے بیگ میں سے 500/500گرام کے4پیکٹ بر آمد ہوئے ۔ دونوں میاں بیوی نے 4,4پیکٹ اپنے جسم کے ساتھ باندھ رکھے تھے۔ کل 8پیکٹ جن کا وزن کرنے پر کل 04کلوگرام ہیروئن پائی گئی۔ ملزمان یہ ہیروئن میانوالی سے ڈیرہ غازی خان لے جارہے تھے ۔اس موقع پر انہوں نے کہا کہ ہمیں اپنے پولیس افسران و جوانوں پر فخر اور ناز ہے۔ جرائم پیشہ لوگوں کو اپنی اصلاح کرنی چاہئے اور محنت کر کے حلال روزی کمائیں اگر وہ جرم کریں گے تو ان کا انجام برا ہو گا اور وہ اپنی زندگی جیل کی سلاخوں کے پیچھے گزاریں گے جرائم پیشہ افراد جتنے بھی ہوشیار بننے کی کوشش کریں گے وہ قانون کی گرفت سے نہیں بچ سکتے اور ان وارداتوں میں ملوث ملزمان کی گرفتاری سے ثابت ہوا کہ پولیس کی نظر سے ایسے لوگ چھپ نہیں سکتے انہوں نے کہا کہ تاجروں، میڈیا کے نمائندوں اورشریف شہریوں کا فرض ہے کہ وہ جرائم کے خاتمے کے لئے پولیس کا بھر پور ساتھ دیں۔ ڈی پی او میانوالی ممتاز احمد دیو نے اس کامیاب کاروائی پر پوری ٹیم کو شاباش دی ۔ نقد انعام اور تعریفی سرٹیفکیٹ دینے کا اعلان کیا ہے۔ ترجمان میانوالی پولیس